Kryeministri britanik Keir Starmer do të përballet me kabinetin e tij, pasi më shumë se 80 deputetë të Partisë Laburiste kanë bërë thirrje që ai të japë dorëheqjen, pas humbjeve shkatërruese të partisë në zgjedhjet lokale javën e kaluar.
Al Jazeera raporton se, kabineti është i ndarë nëse ai duhet të qëndrojë në detyrë apo duhet të largohet. Sekretari kryesor i Starmer, deputeti Darren Jones, i tha Sky News se kryeministri po bisedonte me kolegët, por ishte shumë i qartë se nuk do të largohej.
Sipas raportimeve në mediat britanike, Sekretarja e Brendshme Shabana Mahmood kuptohet se i ka thënë kryeministrit të mbikëqyrë tranzicionin e pushtetit, mes një breshërie deklaratash të ngjashme nga parlamentarët dhe gjashtë ndihmësve ministrorë që dhanë dorëheqjen të hënën. Sekretarja e Jashtme Yvette Cooper dhe Sekretari i Mbrojtjes John Healey u takuan gjithashtu me Starmer dje.
Gjatë një fjalimi të mbajtur të hënën, Starmer mori përsipër përgjegjësinë për rezultatet e dobëta në zgjedhje, por theksoi se Partia Laburiste nuk do t'ua falë udhëheqësve të mëparshëm kaosin e shkaktuar nga ndryshimet e shpeshta. Në zgjedhjet lokale të së enjtes, Laburistët humbën mbi 1,400 vende dhe kontrollin në Uells, ndërkohë që Partia e Reformës dhe të Gjelbrit pësuan rritje.
Aktualisht, për të sfiduar lidershipin e Starmerit, nevojitet mbështetja e 81 gjithsej deputetëve. Ndër emrat që përfliten si pasardhës të mundshëm janë Wes Streeting, Angela Rayner dhe Andy Burnham. Ky i fundit u pengua nga Komiteti Ekzekutiv, pjesë e të cilit ishte edhe Starmer, për të kandiduar në zgjedhjet e shkurtit. Lidhur me këtë, Angela Rayner deklaroi të hënën se bllokimi i tij ishte një gabim strategjik.
