Një sherr me sende të forta dhe thikë është shënuar mbrëmjen e së dielës në Fier, ku për pasojë kanë mbetur të plagosur dy persona.
Policia u vu në lëvizje pas marrjes së informacionit se dy personat e plagosur, të dy 28 vjeç, kishin shkuar për të marrë ndihmë mjekësore në spital. Njëri ka marrë dëmtime në kokë me sende të forta, ndërsa tjetri me mjet prerës.
Policia bën me dije se ka identifikuar njërin prej personave që i ka goditur dy të rinjtë, dhe ka shpallur në kërkim shtetasin K.S, 36-vjeç. Ky person, siç njofton policia, rezulton me precedentë penalë.
Njoftimi i policisë:
Rreth orës 23:00 të datës 10.05.2026, Salla e Komandimit e Drejtorisë Vendore të Policisë Fier ka marrë njoftim se kanë shkuar për ndihmë mjekësore në spital, shtetasi R. H., 28 vjeç, i dëmtuar në kokë, me sende të forta, dhe shtetasi D. H., 28 vjeç, i dëmtuar me mjet prerës. Nga veprimet e kryera nga grupi hetimor, rezultoi se ngjarja ka ndodhur si pësojë e një konflikti të çastit.
Në vijim specialistët për Hetimin e Krimeve të Komisariatit të Policisë Fier bënë të mundur identifikimin e njërit prej shtetasve që ka goditur këta shtetas, konkretisht K. S., 36 vjeç, banues në fshatin Vadhizë, Fier, shtetas me precedent penal, i cili u shpall në kërkim.
Në bashkëpunim me Prokurorinë, vijon puna për zbardhjen e rrethanave të rastit, si dhe për identifikimin dhe kapjen e shtetasve të tjerë të përfshirë në konflikt.
