Një 32-vjeçar është arrestuar në Prrenjas, pasi dyshohet se përdorte lokalin e tij për të përgatitur dhe shpërndarë kokainë në doza për shitje. Në pranga ka përfunduar edhe një 29-vjeçar, i akuzuar për moskallëzim krimi.
Gjatë kontrollit në ambientet e lokalit, policia zbuloi 76 doza dhe sasi të tjera të dyshuara kokainë, të ndara dhe gati për t'u hedhur në treg. Po ashtu u sekuestruan 3 peshore elektronike, 3 celularë, si dhe 48 mijë lekë dhe 450 euro, të dyshuara si të ardhura nga aktiviteti i paligjshëm. Sipas hetimeve, 29-vjeçari u kap në lokal dhe dyshohet se kishte dijeni për aktivitetin e 32-vjeçarit, por nuk e kishte kallëzuar atë. Materialet i janë referuar Prokurorisë së Elbasanit për vijimin e hetimeve.
