Ministri gjerman i Mbrojtjes u përpoq të minimizojë ndikimin e vendimit të Uashingtonit për të tërhequr 5,000 trupa nga Gjermania, duke e paraqitur këtë lëvizje si të pritshme dhe duke e përdorur për të theksuar se Europa duhet të marrë më shumë përgjegjësi për sigurinë e saj.
“Ishte e pritshme që SHBA mund të tërhiqte trupa nga Europa, përfshirë edhe Gjermaninë,” tha Boris Pistorius të shtunën, duke shtuar se “nëse duam të mbetemi transatlantikë, duhet të forcojmë shtyllën europiane brenda NATO-s”.
NATO tha se po “punon me SHBA-në për të kuptuar detajet” e vendimit të Pentagonit për tërheqjen e trupave. Kjo lëvizje e administratës Trump, tha në një deklaratë zëdhënësja e NATO-s Allison Hart, “thekson nevojën që Europa të investojë më shumë në mbrojtje”.
Presidenti amerikan Donald Trump kishte kërcënuar më herët me reduktimin e trupave amerikane, pas një përplasjeje publike me kancelarin gjerman Friedrich Merz, i cili tha se SHBA po “poshtërohej” nga Irani.
Njoftimi i Pentagonit do të lërë sërish rreth 33,000 trupa amerikane në Gjermani, duke kthyer pas një rritje të pranisë ushtarake që kishte nisur gjatë presidencës së Joe Biden.
Një zëdhënës i Komisionit Europian i tha POLITICO-s se prania ushtarake amerikane në Europë është një “kontribut i rëndësishëm për parandalimin dhe mbrojtjen e NATO-s” dhe përbën “themelin e mbrojtjes kolektive për 23 shtete anëtare të BE-së që janë gjithashtu aleate në NATO”. Ai shtoi se vendet e BE-së po i përmbushin angazhimet e tyre ndaj NATO-s duke rritur shpenzimet ushtarake “me një ritëm të paprecedentë”.
Zëdhënësi i Pentagonit, Sean Parnell, tha në një deklaratë se Sekretari amerikan i Mbrojtjes Pete Hegseth e urdhëroi tërheqjen si përgjigje ndaj “kushteve në terren”, pas një rishikimi të pranisë së trupave amerikane në Europë. “Presim që tërheqja të përfundojë brenda gjashtë deri në 12 muajt e ardhshëm,” tha Parnell.
Duke reaguar ndaj njoftimit të Pentagonit, kryeministri polak Donald Tusk dënoi “prirjen katastrofike” në marrëdhëniet Europë-SHBA. “Kërcënimi më i madh për komunitetin transatlantik është shpërbërja në vazhdim e aleancës sonë,” shkroi Tusk në X të shtunën. “Të gjithë duhet të bëjmë gjithçka për ta kthyer mbrapsht këtë prirje katastrofike.”
Trump ka kërcënuar gjithashtu se do të tërheqë trupa amerikane nga Spanja dhe Italia, duke rifilluar sulmet ndaj kryeministrit spanjoll Pedro Sánchez dhe kryeministres italiane Giorgia Meloni. Madridi dhe Roma, ashtu si Berlini, kanë qenë kritike ndaj luftës SHBA-Izrael kundër Iranit.
Duke folur para gazetarëve në Zyrën Ovale të enjten, Trump tha se “me shumë gjasa” do t’i tërhiqte trupat amerikane nga këto dy vende të Europës jugore. Ai tha se Italia “nuk na ka ndihmuar fare” dhe akuzoi Spanjën se është “absolutisht e tmerrshme”. Si Spanja, ashtu edhe Italia kanë refuzuar që avionët ushtarakë amerikanë të përfshirë në luftën me Iranin të përdorin bazat e tyre.
Përgatiti në shqip ©LAPSI.AL
