Disa dashuri bëjnë xhiro të gjata dhe pastaj… të rikthejnë José Mourinho pas 13 vitesh në pankinën e Real Madrid. Po, me kalimin e ditëve po rriten gjithnjë e më shumë gjasat për rikthimin sensacional të “Special One” në pankinën madrilene: trajneri portugez 63-vjeçar do të ishte zgjedhja e parë e presidentit Florentino Pérez, me të cilin marrëdhëniet nuk janë ndërprerë kurrë. Çështja është se bashkë me teknikun do të kishte ndryshime të madhe: Olise e Rodri do të vinin në Bernabeu.
Mourinho favorit për pankinën e Real Madrid: një rikthim pas 13 vitesh
Mourinho ka kontratë me Benfica deri në qershor 2027, por ekziston një klauzolë largimi (e vlerësuar rreth 5-6 milionë euro) që mund ta lirojë për sezonin e ardhshëm. Real Madrid ka vendosur prej kohësh se eksperimenti me Álvaro Arbeloa, i thirrur për të zëvendësuar të shkarkuarin Xabi Alonso në janar, ka dështuar: zero tituj këtë sezon janë një ngjarje shumë e rrallë në historinë e “Casa Blanca”, që kërkon një reagim të fortë për të rifilluar sfidën me Barcelona dhe për të synuar Champions-in e 16-të.
Sipas The Athletic, “Vate i Setubalit” është kandidati i preferuar i Florentinos, një lëvizje romantike që do të sillte në pankinë një trajner gati të përdorë, nëse duhet, dorën e fortë me një skuadër plot yje, por jo gjithmonë të bashkuar dhe të përkushtuar në sakrificë.
Dy goditje të mëdha në horizont për Florentino Perez: Olise dhe Rodri
Një grup që ka disa lojtarë në listën e largimeve, por që gjithsesi përfshin emra të nivelit super si Kylian Mbappé dhe Vinícius Júnior. Sulmi i Real-it të ri mund të plotësohet në të djathtë nga Michael Olise, i shkëlqyer edhe të martën në gjysmëfinalen e Champions-it të humbur 5-4 ndaj PSG. Bild e ka lidhur 25-vjeçarin me Madridin, një operacion i vështirë sa çmimi i tij, të dyja jashtëzakonisht të larta.
Bayern Munich e konsideron të paprekshëm, kontrata e Olise është e gjatë (deri në 2029) dhe nuk ka klauzolë lirimi: për ta marrë, Real Madrid duhet të bëjë një ofertë mbi 150 milionë euro dhe të bindë kampionët e Gjermanisë. Një lëvizje merkatoje po aq tronditëse sa rikthimi i Mourinhos.
Një tjetër emër i përfolur është Rodri i Manchester City (kontratë deri në 2027), që do të formonte një dyshe në mesfushë me Valverde, ndërsa Arda Güler do të luante në trekuartësh mes Vinicius dhe Olise pas Mbappé. Në mbrojtje nuk priten ndryshime, me linjën e përbërë nga Trent, Rüdiger, Huijsen dhe Carreras përpara Thibaut Courtois. Me pak fjalë, Mou nuk do të gjente aspak një skuadër të dobët…
