Një operacion i policisë kufitare italiane ka çuar në arrestimin e një 36-vjeçari shqiptar në aeroportin ndërkombëtar të Milano, Malpensa Airport në Itali. Sipas autoriteteve, i dyshuari ishte në kërkim me urdhër-arresti për tentativë vrasjeje, ndërsa ndaj tij rëndojnë edhe akuza të tjera si mbajtje e paligjshme arme dhe përfshirje në mallra të vjedhura.
Hetimet nisën pas një incidenti të ndodhur më 13 prill, kur 36-vjeçari u përpoq t’i shmangej policisë duke ikur me vrap sapo pa një patrullë. Ai u përpoq të humbiste gjurmët duke u përzier me pasagjerët dhe duke hequr veshjen e jashtme, përpara se të largohej me automjet.
Zbulimi i tij u bë i mundur falë analizës së kamerave të sigurisë dhe përdorimit të bazave të të dhënave policore, të kombinuara me teknologji të njohjes së fytyrës, që ndihmuan në identifikimin e shpejtë të tij.
Autoritetet italiane kanë bërë të ditur se ndaj tij ekzistonte edhe një vendim gjyqësor me dënim prej një viti e një muaji burg, krahas hetimeve të tjera të hapura. Gjatë hetimeve, policia ka gjurmuar edhe kontaktet e tij, duke identifikuar një grua dhe një fëmijë të lidhur me të, të cilët kishin mbërritur së fundmi nga Bakuja. Arrestimi u krye në momentin kur ai po priste t’i takonte në zonën e mbërritjeve të aeroportit. Gjatë kontrollit personal dhe të automjetit, policia sekuestroi një armë zjarri tip Beretta kalibër 7.65 mm me numër serial të fshirë, një karikator me fishekë dhe një fishek të futur në tytë, të fshehura mes sendeve personale.
Gjithashtu u gjetën pajisje të dyshuara për vjedhje, pajisje elektronike, përfshirë GPS dhe telefona celularë, si dhe dy palë targa të falsifikuara, njëra prej të cilave dyshohet se lidhet me një tentativë grabitjeje në zonën e Cuneos. Në përfundim të operacionit, ai u arrestua dhe u dërgua në burgun e Busto Arsizio, në pritje të vendimeve të mëtejshme të autoriteteve gjyqësore.
