Justin Baldoni dhe Blake Lively vijojnë përplasjen ligjore, ndërsa akuzat mes palëve janë ashpërsuar ndjeshëm para nisjes së gjyqit.
Gjatë një seance paraprake të mbajtur të martën, avokatët e kompanisë së produksionit Wayfarer Studios, në pronësi të Baldonit, deklaruan se kompania nuk mban përgjegjësi për humbjet e pretenduara në karrierën e Lively, duke e cilësuar aktoren si “bullizuese” dhe duke përmendur një histori sipas tyre jo të suksesshme në biznes.
Sipas raportimeve, pala e Baldonit argumentoi se mungesa e popullaritetit të Blake Lively ka ndikuar në dështimin e disa projekteve të saj, përfshirë linjën e pijeve Betty Buzz, dhe jo ndonjë fushatë shpifjeje – siç pretendon aktorja.
Të dy aktorët, bashkëprotagonistë në filmin “It Ends With Us”, kanë paraqitur prova në gjykatë në prag të gjyqit të planifikuar për 18 maj. Çështja buron nga një padi e ngritur në dhjetor 2024 nga Lively, e cila akuzon Baldonin dhe kompaninë e tij për ngacmim seksual dhe hakmarrje.
Avokatët e Baldonit kundërshtuan gjithashtu pretendimin e aktores se ajo ka humbur deri në 132 milionë dollarë të ardhura të mundshme në pesë vitet e ardhshme, duke theksuar se ajo nuk ka një angazhim të vazhdueshëm në projekte filmike.
Sipas tyre, Blake Lively ka pasur një “karrierë të fragmentuar”, duke fituar rreth 21 milionë dollarë nga projektet filmike gjatë tetë viteve para vitit 2024.
Në gjykatë u përmend edhe një incident i vitit 2024, kur aktorja u kritikua për një postim në rrjetet sociale që shihej si tallje ndaj Kate Middleton lidhur me një foto të manipuluar. Avokatët e Baldonit pretenduan se ky episod ka ndikuar negativisht në imazhin publik të Lively.
Nga ana tjetër, Lively ka deklaruar më herët se një “fushatë dashakeqe” kundër saj i ka shkaktuar humbje deri në 300 milionë dollarë, për shkak të projekteve të humbura në periudhën 2024–2029.
Ndërkohë, një gjykatës ka rrëzuar së fundmi 10 nga 13 akuzat e ngritura nga aktorja, duke lënë në fuqi vetëm disa prej tyre, përfshirë shkeljen e kontratës dhe hakmarrjen.
Avokatja e Blake Lively u shpreh se aktorja është e gatshme të dëshmojë në gjyq dhe të tregojë versionin e saj.
“Qëllimi i saj është të dëgjohet në sallën e gjyqit dhe kjo është ajo ku jemi fokusuar tani,” tha ajo, duke shtuar se Lively ndihet e përgatitur për përballjen ligjore që pritet të zhvillohet më 18 maj.
