Kancelari gjerman, Friedrich Merz, deklaroi sot se anëtarësimi i menjëhershëm i Ukrainës në Bashkimin Evropian nuk është i realizueshëm, duke theksuar se hapi i radhës duhet të jetë një proces para-anëtarësimi.
Duke folur për zhvillimet në Lindjen e Mesme, Merz u shpreh se Irani “po luan me kohën”, ndaj sipas tij është e nevojshme rritja e presionit ndërkombëtar. Megjithatë, ai theksoi se ekziston hapësirë për lehtësim të sanksioneve nëse Teherani tregon gatishmëri për kompromis.
“Askush në Samitin e BE-së nuk kundërshton faktin se sanksionet mund të zbuten, nëse Irani është i gatshëm të bëjë lëshime”, u shpreh ai.
Sipas kancelarit gjerman, kjo qasje mund të shërbejë si një kontribut për të çuar përpara procesin diplomatik dhe, në mënyrë ideale, për të arritur një armëpushim të qëndrueshëm.
Presion i shtuar ndaj Rusisë
Në lidhje me paketën e re të sanksioneve të vendosura nga Bashkimi Evropian ndaj Rusisë, Merz nënvizoi se presioni ndaj Moskës do të vazhdojë të rritet në vijim.
Sa i përket integrimit të Ukrainës në BE, ai ritheksoi se një anëtarësim i shpejtë nuk është i mundur në kushtet aktuale, duke sugjeruar se fokusi duhet të jetë tek avancimi i procesit para-anëtarësues.
