Pak ditë më parë Piranjat publikuan një skemë zaptimi të hapësirave publike dhe zhvillimin e aktiviteteve pa leje në bregdetin e Vlorës duke ngritur pikëpyetje serioze mbi funksionimin e institucioneve dhe ndikimin politik në këto procese.
Në qendër të kësaj çështjeje është Aljon Çakërri, drejtor i Qendrës së Peshkimit në Vlorë, i cili sipas denoncimeve dhe verifikimeve në terren rezulton i përfshirë në zhvillimin e një aktiviteti për mjete ujore në zonën e Triportit, në dëm të hapësirave të dedikuara për peshkatarët.
Aktiviteti rezulton i regjistruar në emër të Olsen Sherifaj, ortakut te Çakërrit, por sipas dëshmive në terren është ky i fundit që shfaqet si personi që menaxhon realisht operacionin.
Pas publikimit të rastit në emisionin Piranjat, Policia e Vlorës ka nisur procedimin penal për shtetasin Olsen Sherifaj, 41 vjeç, banues në Vlorë, pasi dyshohet se ka vendosur pa leje, inerte dhe goma automjetesh, në det, në Triport, me qëllim ndërtimin e një moli.
Burime për Piranjat bëjnë me dije se Policia e Vlorës dhe IKMT kanë qenë ditën e djeshme ne vendngjarje ku kanë verifikuar shkeljet e publikuara në emision.
Njoftimi i policisë
Specialistët për Hetimin e Krimeve te Komisariatit te Policise Vlore referuan materialet në Prokurori, ku nisi procedimi penal për shtetasin O. Sh., 41 vjeç, banues në Vlorë, pasi dyshohet se ka vendosur pa leje, inerte dhe goma automjetesh, ne det, në Triport, me qëllim ndërtimin e njé moli.
