Real Madrid është jashtë edhe nga Champions League dhe do ta mbyllë sezonin e dytë radhazi pa fituar asnjë trofe. Nuk është një zakon në “Bernabeu”, ku çdo vit koleksioni pasurohet me një kupë të re për t’u ekspozuar. Eliminimi ndaj Bayern Munich ka nxjerrë “Blancos” jashtë çdo gare dhe tani mbetet vetëm kampionati, ku Barcelona është në vend të parë me nëntë pikë avantazh.
Nëse nuk arrin të rikuperojë këtë diferencë me një përmbysje të madhe, Real Madrid do të mbetet pa trofe për sezonin e gjashtë në 100 vitet e fundit. Është një statistikë e çuditshme që tregon madhështinë e klubit, por edhe thekson krizën e thellë që ka përjetuar pas largimit të Carlo Ancelotti dhe ndryshimeve në pankinë me Xabi Alonso dhe Arbeloa që nuk kanë sjellë rezultate.
Sezoni i dytë radhazi pa trofe për Real Madrid
Nuk janë “Galacticos” kot: 36 kampionate, 15 Champions League dhe shumë trofe të tjerë zbukurojnë vitrinat e muzeut të “Blancos”, që këtë vit nuk do të kenë asgjë për të shtuar, pasi janë eliminuar nga Champions League dhe Kupa e Mbretit dhe në kampionat janë të dytët me nëntë pikë larg kreut. Me shumë gjasa do të jetë një nga sezonet e pakta pa trofe për Real Madridin, një rast që ka ndodhur vetëm pesë herë në 100 vitet e fundit.
Vetëm në vitet 2005, 2006, 2010, 2021 dhe 2024 spanjollët e kanë mbyllur sezonin pa fituar asnjë kupë, një fakt shumë i pazakontë për tifozët e mësuar të fitojnë të paktën një trofe çdo vit në këtë shekull. Është e rrallë të shohësh Real Madrid në vështirësi të tilla dhe nervozizmi i shfaqur në Champions kundër Bayern Munich është simptoma më e dukshme e problemeve që e mundojnë këtë skuadër, e paaftë të ngrihet pas epokës së Carlo Ancelotti: edhe ai e kishte mbyllur eksperiencën pa trofe, por askush nuk do ta kishte pritur që ky dështim të përsëritej për të dytin vit radhazi.
