Mijëra udhëtarë po përballen me radhë të gjata, vonesa të mëdha dhe anulime fluturimesh në shumë aeroporte evropiane për shkak të sistemit të ri të kontrollit kufitar (EES) të Bashkimit Evropian. Sistem ky i cili kërkon regjistrim biometrik gjatë hyrjes dhe daljes nga zona Shengen.
Sistemi i ri kërkon mbledhjen e të dhënave biometrike, siç janë gjurmët e gishtërinjve dhe fotografitë, për udhëtarët nga vendet jashtë zonës Shengen, përfshirë Mbretërinë e Bashkuar. Radhë të gjata dhe vonesa u raportuan të shtunën dhe të dielën në aeroportet kryesore evropiane, përfshirë Gjenevën, Lisbonën dhe Maltën, ndërsa probleme u raportuan edhe në qendra si Brukseli dhe Holanda.
Sipas mediave të huaja, ndërprerjet vazhduan edhe sot, me pasagjerët në Aeroportin e Brukselit dhe Schiphol të Amsterdamit që raportuan vonesa deri në dy orë në mediat sociale në kontrollin e pasaportave. Në Milano, pasagjerët raportuan se njerëz u ranë të fikët pasi pritën deri në tre orë në kontrollin e pasaportave të dielën në mbrëmje. Rreth 100 klientë të easyJet mbetën të bllokuar në aeroportin e Milanos Linate ndërsa prisnin të hipnin në një fluturim për në Mançester, pasi ekuipazhi vendosi të nisej pa ta.
Kompania ajrore tha se situata ishte jashtë kontrollit të saj dhe se problemet ishin për shkak të sistemit të ri të kontrollit kufitar të BE-së, duke i përshkruar vonesat si të papranueshme. EasyJet thuhet se e vonoi fluturimin me 52 minuta për t'u dhënë pasagjerëve më shumë kohë për të kaluar kontrollin e pasaportave. Megjithatë, ndërsa ekuipazhi i afrohej numrit maksimal të orëve të lejuara për arsye sigurie, fluturimi u nis me shumë vende bosh.
