Një delegacion nga Irani pritet të mbërrijë sot në Pakistan për të nisur negociatat me Shtetet e Bashkuara të Amerikës, në një përpjekje për t’i dhënë fund konfliktit të vazhdueshëm.
Lajmi është konfirmuar nga ambasadori iranian në Pakistan, Reza Amiri Moghadam, i cili njoftoi se delegacioni do të zhvillojë bisedime në Islamabad.
Sipas tij, pala iraniane do të takohet të shtunën me zëvendëspresidentin amerikan, JD Vance. Negociatat pritet të bazohen në një paketë me “10 pika” të propozuara nga Teherani, megjithëse detajet e sakta të kësaj platforme mbeten ende të paqarta.
Në një reagim në rrjetet sociale, Moghadam theksoi se bisedimet do të zhvillohen pavarësisht skepticizmit të opinionit publik në Iran. Ai akuzoi Izraelin për “shkelje të përsëritura të armëpushimit”, të cilat sipas tij synojnë të minojnë përpjekjet diplomatike.
Takimi në Islamabad shihet si një hap i rëndësishëm në përpjekjet për uljen e tensioneve, megjithatë mbetet e paqartë nëse palët do të arrijnë një marrëveshje konkrete në një klimë të brishtë mosbesimi.
