Autoritetet në Çekia kanë arrestuar shtatë persona, mes tyre dy zyrtarë të lartë nga ministria e Industrisë, nën dyshimin për mashtrim me fondet e Bashkimit Evropian. Sipas Zyra e Prokurorit Publik Evropian (EPPO), të dyshuarit tentuan të përvetësonin rreth 13.5 milionë euro (340 milionë korona çeke) përmes subvencioneve të BE-së.
Hetimi lidhet me fonde që dyshohet se janë përfituar në mënyrë të paligjshme për krijimin e një qendre inovacioni për startup-e në fushën e strehimit, si dhe për programe shkencore. Ndër të arrestuarit ndodhet edhe një zyrtar i lartë nga Departamenti i Planifikimit Urban. Institucionet përkatëse në Çeki nuk kanë komentuar ende mbi rastin.
Sipas hetimeve të EPPO-së, një biznesmen me lidhje me zyrtarët shtetërorë kishte paraqitur informacione të rreme pranë ministrisë që menaxhon fondet, me qëllim përfitimin e paligjshëm të subvencioneve.
Në kuadër të operacionit, policia çeke zhvilloi 13 kontrolle në bashkëpunim me EPPO-në, gjatë të cilave u sekuestrua një ndërtesë dhe rreth 2 milionë euro në llogari bankare. Hetimet vijojnë, ndërsa autoritetet synojnë të zbardhin plotësisht skemën e dyshuar të abuzimit me fondet evropiane.
