Shkrimtari dhe publicisti Fatos Lubonja thotë se zërat ndryshe në Partinë Socialiste, si deputetët Erion Braçe dhe Elisa Spiropali, nuk pritet të sjellin ndryshime në këtë parti.
I ftuar në studion e News24, Lubonja tha se kryeministri Edi Rama i ka spastruar herë pas here eksponentët që ishin një zë kundër tij, siç ishte rasti i LMN-së, mendimi ndryshe i drejtuar nga Ben Blushi dhe së fundmi me zhvendosjen e disa figurave si Elisa Spiropali.
Sipas tij, Braçe bën pjesë bashkë me disa emra që kanë qenë në PS para Ramës, por ai ka pasur gjithnjë kujdes që t’i pastrojë ata eksponentë që t’i bënin sadopak hije, si Blushi, Islami dhe Malaj.
“Kandidati nuk do të jetë Braçe, por ndonjë mashë e Ramës e sigurt, ndoshta Manastirliu. Braçe bën pjesë bashkë me disa emra që kanë qenë në PS para Ramës, por Rama ka pasur gjithnjë kujdes që t’i pastrojë ata eksponentë që t’i bënin sadopak hije atij, si Ben Blushi, Kastriot Islami, Arben Malaj, që bënë një ide, mendim ndryshe. Të tjerët nuk kanë menduar as të formulojnë ndonjë kritikë. Këtyre nuk u ka mbetur “asnjë pikë yndyre” siç thotë populli dhe Rama kështu i do.
Spiropali dhe Rama kanë sherre personale, që e shqetësojnë PS. Rama s’mund të bëjë transformim thelbësor, por ai ka bërë gjithnjë praktikën, të ndryshojë gjithçka për të mos bërë asgjë.
Kurse për Spiropalin mendoj se është një figurë e djegur, u vetësakrifikua mendoj. Por Ramën e shqetësojnë, sepse kur të lë edhe Spiropali, apo “Mamica” siç i thoshte, pra motra jote, atëherë mendo se çfarë ke bërë. Në këtë aspekt, Braçe, Spiropali apo të tjerë të heshtur aty janë zhveshje totale e mbretit lakuriq” – tha Lubonja. ©LAPSI.al
