Një shpërthim me lëndë plasëse është regjistruar pas mesnate në fshatin Toç të Memaliajt. Shpërthimi shkaktoi dëme materiale në oborrin e një banese. Ngjarja ka ndodhur rreth orës 00:10. Sipas njoftimit të policisë, një sasi tritoli dyshohet se është vendosur në oborrin e banesës së një 67-vjeçari.
Pas shpërthimit, autorët dyshohet se janë larguar me automjet, të cilin më pas e kanë djegur në aksin “Krahës–Memaliaj”, pranë fshatit Qesarat. Për të humbur gjurmët ata janë larguar më tej në këmbë. Policia ka nisur kontrolle në zonë për kapjen e autorëve, ndërsa hetimet vijojnë për zbardhjen e plotë të rrethanave të ngjarjes.
