Një aksident i rëndë në punë në zonën industriale të Shkodrës ka zbuluar aktivitetin e paligjshëm të një fabrike kompostimi, ku mbeti i plagosur rëndë një shtetas i huaj. Fillimisht, i dëmtuari deklaroi se ishte lënduar në një hotel. Por më pas, pas publikimit të një fotoje ku shihej duke dalë i gjakosur nga ambientet e fabrikës, ai pranoi se ishte plagosur gjatë punës.
Sipas burimeve, ai ka pësuar prerje të rënda në gjymtyrë dhe iu nënshtrua një ndërhyrjeje urgjente në Spitalin Rajonal të Shkodrës. Hetimet paraprake tregojnë se ai punonte prej kohësh në këtë subjekt, i cili dyshohet se ushtronte aktivitet në të zezë, pranë shkollës “Arben Broci”. Policia ka nisur hetimet për zbardhjen e plotë të ngjarjes, duke u fokusuar te kushtet e sigurisë në punë dhe ligjshmëria e aktivitetit, si dhe përgjegjësia e pronarëve të fabrikës.
