Një zhvillim i rëndësishëm ka ndodhur në çështjen ligjore mes aktores Blake Lively dheregjisorit Justin Baldoni, pasi një gjykatës federal ka rrëzuar shumicën e akuzave të ngritura nga Lively.
Sipas dokumenteve gjyqësore, gjyqtari Lewis Liman ka hedhur poshtë 10 nga 13 pretendimet e paraqitura nga aktorja, përfshirë akuzat për ngacmim seksual, shpifje dhe komplot.
Megjithatë, tre prej pretendimeve do të vazhdojnë të shqyrtohen në gjykatë: shkelje kontrate, hakmarrje dhe bashkëpunim në veprime hakmarrëse.
Ekipi ligjor i Lively deklaroi se rrëzimi i akuzës për ngacmim seksual nuk lidhet me mungesë provash ndaj palës tjetër, por me një çështje teknike — gjykata vendosi se aktorja konsiderohet kontraktore e pavarur dhe jo e punësuar, çka ndikon në bazën ligjore të pretendimit.
“Ky rast ka qenë dhe mbetet i fokusuar në hakmarrjen shkatërruese dhe në përpjekjet ekstreme për të dëmtuar reputacionin e Blake Lively pasi ajo ngriti zërin për sigurinë në set,” thuhet në deklaratë.
Gjithashtu, theksohet se aktorja është e vendosur të dëshmojë në gjyq dhe të ekspozojë atë që e cilëson si një formë të rrezikshme të sulmeve të koordinuara online.
Gjyqi mes palëve pritet të nisë më 18 maj.
