Njoftimi i ambasadës amerikane në Tiranë që foli për sulme të mundshme nga "grupet e lidhura me Iranin" në Shqipëri të cilët mund të synojnë "vende turistike, qendra tregtare, hotele, klube dhe restorante" është shoqëruar me një shqetësim mes qytetarëve që luftën në Lindjen e Mesme, e kishin parë si shumë të largët, por edhe ka vënë në lëvizja strukturat e Antiterrorit, që deri më parë nuk kishin dhënë asnjë shenjë lëvizjeje në këtë aspekt.
Por një temë e tillë u trajtua edhe disa javë më parë pas një shkrimi të mediave të Azerbajxhanit që kishin raportuar se sipas një njoftimi në Telegram nga shërbimi i Korpusit të Gardës Revolucionare Islamike (IRGC), kampi Ashraf në Manzë, ku janë strehuar muxhahedinët ishte si objekt i mundshëm i veprimeve.
Media azere: Irani mund të sulmojë bazën e Muxhahedinëve në Shqipëri
Vetëm se në atë kohë, autoritetet e morën këtë sinjal desinformues, duke fajësuar mediat për përcjelljen e një shqetësimi të tillë. Në një dalje publike në podcastin e përjavshëm të datës 8 Mars, kryeministri Edi Rama tregoi se nuk pati asnjë përpjekje për ta vlerësuar seriozisht një përpjekje të tillë nga Irani.
Ai i quajti thashetheme, spekulime, dizinformim dhe gënjeshtra mundësinë e sulmeve nga Irani dhe se pasqyrimi i këtij lajmi ishte një mënyrë kriminale dhe e papërgjegjshme e raportimit.
Sipas Ramës, meqënëse Shqipëria ishte antare e NATO-s, ishte e mbrojtur nga çdo sulm i mundshëm dhe këtë e tregonte reagimi i shpejtë për raketat që u lëshuan për të sulmuar Qipron dhe Turqinë.
"Ju kujtoj të gjithëve që Shqipëria është anëtare e NATO-s dhe sikundër NATO e demonstroi qartësisht në Turqi, ku goditi menjëherë një raketë të ardhur nga Irani, gjë të cilën pastaj e nënvizoi bukur mirë edhe gjenerali amerikan i komandës së NATO-s, qartësisht, kjo shpejtësi reagimi dhe ky kapacitet reagimi vlen për të gjitha vendet anëtare të NATO-s" shprehej Rama.
Por me alarmin që ka shpërndarë ambasada amerikane duket se situata është më e komplikuara, pasi vërtet Shqipëria është e mbrojtur nga raketat e Iranit, por masat duhen marrë edhe nga sulme të një lloji tjetër që siç thotë ambasada kanë të bëjnë me grupet e lidhura me Iranin që mund të shënjestrojnë hapësira publike, një formë tjetër e sulmit, për të cilat autoritetet e kishin fjetur mendjen.
Më poshtë është reagimi i Ramës në datën 8 Mars, kur kryeministri, meqënëse është i mbrojtur nga sistemet e NATO-s thotë se nuk ishte nevoja për t'u shqetësuar nga ato që i quan "ondrra nbeze".
Reagimi i plotë i Edi Ramës në datën 8 Mars për raportimin e mediave azere
Përsa i takon Shqipërisë, ka pasur lloj-lloj thashethemesh dhe spekulimesh, dhe interesante është që, ndryshe nga vendet e tjera në Shqipëri, të keqen më të madhe ne e kemi brenda dhe burimin më të madh të dezinformimit, të gënjeshtrave, të deformimit të informacionit, ne ndryshe nga të tjerët, nuk kemi pse e kërkojmë gjetkë, sepse e kemi këtu.
Dhe nga këtu është prodhuar në mënyrën më kriminale dhe të papërgjegjshme edhe një seri lajmesh për gjoja mundësinë e sulmit mbi Shqipërinë. Por, ju kujtoj të gjithëve që Shqipëria është anëtare e NATO-s dhe sikundër NATO e demonstroi qartësisht në Turqi, ku goditi menjëherë një raketë të ardhur nga Irani, gjë të cilën pastaj e nënvizoi bukur mirë edhe gjenerali amerikan i komandës së NATO-s, qartësisht, kjo shpejtësi reagimi dhe ky kapacitet reagimi vlen për të gjitha vendet anëtare të NATO-s, me gjithë keqardhjen për të keqen, që me siguri nuk e ka aspak problem, nëse do t’i jepej mundësia ta provonte edhe ndonjë sulm mbi Shqipërinë, vetëm e vetëm për të ushqyer shpresën e kotë dhe siç thonë tironsit, “ondrrën në beze”, se do të përmbyset i ashtuquajturi “regjimi i Edi Ramës”.
