Ambasada e Shteteve të Bashkuara të Amerikës ka bërë një tjetër reagim pas njoftimit të së mërkurës në lidhje me rreziqet e sulmeve nga Irani. Në një reagim dhënë për emisionin “Kjo Javë” nga Nisida Tufa në News24, një zyrtar i ambasadës u shpreh se administrata Trump nuk ka përparësi më të lartë se siguria dhe mbrojtja e amerikanëve, ndërsa theksoi se ambasada po bashkëpunon ngushtë me autoritetet shqiptare për të vlerësuar situatën dhe për të zbutur rreziqet e sigurisë.
Pyetjet e News24
-Ku mbështeten analiza të tilla, duke qenë se Agjencia për Media dhe Informim e Qeverisë shqiptare në një deklaratë, thekson se: “agjencitë ligjzbatuese të Shqipërisë nuk e kanë asnjë informacion shqetësues lidhur me këtë hamendësim të ambasadës amerikane”.
-A janë njoftuar autoritetet shqiptare për marrjen e masave për rritjen e sigurisë në vende të caktuara, ku rreziku është më i lartë?
Reagimi i ambasadës amerikane për “Kjo javë”
“Administrata Trump nuk ka përparësi më të lartë se siguria dhe mbrojtja e amerikanëve. Ne po bashkëpunojmë ngushtë me autoritetet shqiptare për të vlerësuar situatën dhe për të zbutur rreziqet e sigurisë. Ambasada e Shteteve të Bashkuara vlerëson bashkëpunimin e saj të ngushtë në çështjet e sigurisë me Qeverinë e Shqipërisë, e cila ka shfaqur një angazhim të vazhdueshëm për të garantuar sigurinë e qytetarëve amerikanë dhe të gjithë banorëve të Shqipërisë. Ne do të ofrojmë më shumë informacion sapo të jetë i disponueshëm.”
