Detaje të reja kanë dalë në lidhje me ngjarjen e ndodhur mëngjesin e sotëm në fshatin Bulgarec, në Korçë, ku një 78-vjeçar u gjet pa shenja jete në banesën e tij. Mësohet se viktima është identifikuar si Gëzim (M) Vija, i cili jetonte i vetëm në banesë prej rreth 25 vitesh.
Trupi i pajetë është gjetur në banesën ku ai jetonte dhe më pas është dërguar për ekspertizë mjekoligjore, me qëllim përcaktimin e saktë të shkakut të vdekjes. Gëzimi rezulton i divorcuar dhe ka katër fëmijë, dy prej të cilëve jetojnë në Korçë, ndërsa dy të tjerë jetojnë jashtë shtetit.
Familjarët janë thirrur në komisariat për të dhënë deklarimet e tyre, pasi deri më tani nuk ka ende një motiv të përcaktuar për ngjarjen. Grupi hetimor, nën drejtimin e Prokurorisë, po vijon punën për zbardhjen e plotë të rrethanave. Nga hetimet paraprake dyshohet se i moshuari mund të jetë goditur me një send të fortë, ndërsa ekspertiza më e detajuar pritet të kryhet në morgun e Spitalit të Korçës.
