Italia u mund nga Bosnja me penallti, duke humbur për herë të tretë radhazi kualifikimin në Botëror. Gianluigi Donnarumma nuk arriti të presë asnjë goditje nga pika e bardhë, duke mos kompensuar gabimet e shokëve të kombëtares, por u bë protagonist i një episodi polemik që e pa ballë për ballë me portierin kundërshtar, Nikola Vasilj. Arsyeja e gjithë tensionit ishte “vjedhja ose lufta e letrave”, që të dy lojtarët kishin vendosur pas portës dhe ku ishin shënuar disa informacione për gjuajtësit kundërshtarë të penalltive. Portieri ballkanas e gjeti të rrudhosur, duke fajësuar italianin se kishte tentuar ta shqyente. “Gigio” u duk dukshëm i irrituar sepse ishte i bindur se letra e tij i ishte vjedhur pikërisht nga Nikola Vasilj.
Megjithatë, në fund të ndeshjes, letra e debatit u publikua në rrjetet sociale nga mbledhësi i topave që ndodhej pranë portës. Një kaos që krijoi tension dhe konfuzion, që edhe vetë arbitri Clément Turpin e pati të vështirë ta menaxhonte.
Episodi i letrës: tension mes portierëve
Pasi Pio Esposito gaboi penalltinë e tij, Gianluigi Donnarumma pati një debat të ashpër me portierin boshnjak Nikola Vasilj. Objekti i diskutimit ishte një copë e vogël letre, në të cilën portieri i Bosnjës kishte shënuar një sërë informacionesh mbi mënyrën e goditjes së penalltive nga lojtarët italianë. Sipas rindërtimeve të gazetës Bild, “Gigio” do ta kishte marrë dhe rrudhosur atë letër, për ta bërë të palexueshme.
Nga pamjet e atyre momenteve të transmetuara në regji kuptohet diçka, por dinamika e saktë e episodit nuk është e qartë: shihen dy portierët duke debatuar, me italianin veçanërisht nervoz. Arbitri francez ndërhyri për të qetësuar situatën, ndërsa portieri boshnjak tregonte letrën e shqyer. Mbaroi këtu? Jo.
“Misteri” i letrës së Gigios që u zhduk
Pavarësisht debatit për letrën, shënimet rezultuan të padobishme: Nikola Vasilj nuk iu desh të priste asnjë goditje nga italianët. Tentativa e Pio Esposito përfundoi mbi traversë, ndërsa goditja e Bryan Cristante u ndal nga shtylla. Pikërisht në atë moment u shemb çdo iluzion i Italisë. Shpresa e fundit ishte të mbështetej te duart e mëdha të Gigios, por u zhduk edhe ajo bashkë me letrën që kishte sjellë me vete. Dy mbledhës topash boshnjakë e gjetën në tokë dhe e morën, duke shkaktuar frustrimin e portierit italian. Më pas, njëri prej dy djemve publikoi në rrjetet sociale listën e gjuajtësve italianë të penalltive, e shpërndarë më tej nga mediat ballkanase, duke ushqyer edhe më shumë polemikat. Në mbrëmjen e pendesave të Italisë ishte edhe kjo.
