Parlamenti Evropian synon të ndalojë sistemet e inteligjencës artificiale të afta për të gjeneruar imazhe artificiale me lakuriqësi. Në Bruksel, eurodeputetët votuan me shumicë të madhe në favor të një ndalimi.
Të ashtuquajturit sisteme "nudifikuese" përdorin inteligjencën artificiale për të krijuar ose manipuluar imazhe seksuale të qarta ose intime, që i ngjajnë një personi real të identifikueshëm, pa pëlqimin e atij personi.
Imazhe dhe video të tilla "dëmtojnë viktimat dhe shkelin të drejtat themelore të dinjitetit dhe privatësisë", thuhet në memorandumin shpjegues të projektligjit. Një ndalim i qartë do të ishte "urgjent dhe i nevojshëm".
"Më shumë se njëqind aplikacione që nuk bëjnë asgjë tjetër”
Me këtë, BE po reagon, ndër të tjera, ndaj incidenteve që ndodhën në fillim të këtij viti kur përdoruesit krijuan dhe shpërndanë miliona imazhe të seksualizuara të gjeneruara nga inteligjenca artificiale të grave dhe fëmijëve në internet duke përdorur chatbot-in Grok, të zhvilluar nga miliarderi amerikan Elon Musk. Disa vende dhe Komisioni Evropian kanë hapur hetime për Grok-un - disa e kanë bllokuar chatbot-in.
Përveç rasteve të Grok-ut, ka "më shumë se njëqind aplikacione që në të vërtetë nuk bëjnë asgjë tjetër dhe janë tërësisht të specializuara në krijimin e këtyre imazheve seksualisht eksplicite”, tha eurodeputetja e Gjelbër Alexandra Geese. Tregu mund të përcaktohet qartë. Industria duhet të kuptojë se "nuk ia vlen të investohet në zhvillimin e sistemeve të tilla”, shtoi Geese.
Vendimi përfundimtar u takon shteteve anëtare të BE
Përpara se të hyjë në fuqi një ndalim në të gjithë BE, së pari duhet të arrihet një marrëveshje me shtetet anëtare të BE. Shtetet kanë shprehur kohët e fundit mbështetje për një ndalim të ngjashëm.
Qeveria gjermane ka punuar për ndryshimin e kodit penal në lidhje me dhunën digjitale. Projektligji i Ministres së Drejtësisë Stefanie Hubig do të kalojë këtë javë në konsultim paraprak me Zyrën Kancelarore dhe ministritë e tjera. Plani është që krijimi dhe përhapja e deepfakes të ndëshkohet me një dënim deri në dy vjet burg.
Ministrja Hubig i njoftoi këto plane në kontekstin e rastit të aktores Collien Fernandes. Javën e kaluar, Fernandes paraqiti publikisht një ankesë për dhunë seksuale digjitale kundër ish-bashkëshortit të saj, Christian Ulmen. Ulmen, nga ana e tij, i kundërshton këto akuza. /DW
