Një tragjedi ndodhi të mërkurën në Daulatdia, distrikti Rajbari në Bangladesh, kur një autobus që po përpiqej të hipte në një traget humbi kontrollin dhe ra në lumin Padma. Të paktën 24 persona humbën jetën.
Sipas informacioneve nga Aljazeera, autobusi, i cili transportonte 40 persona, u përmbys dhe u gjet i zhytur pothuajse 9 metra thellë në lumë.
Një zyrtar i zjarrfikësve tha se ekipet e shpëtimit nxorën 22 trupa nga autobusi i zhytur, përfshirë 5 fëmijë, 11 gra dhe 6 burra. Dy gra vdiqën menjëherë pas shpëtimit të tyre.
"Autobusi po priste të hipte në një traget kur ra në lumë. Disa pasagjerë dolën nga autobusi, por anëtarët e familjeve të tyre vdiqën, të bllokuar brenda", tha për AFP një dëshmitar okular 35-vjeçar.
Videot që qarkullojnë në mediat sociale kapin momentin kur një autobus përpiqet të hipë në një traget, humbet kontrollin dhe bie në ujë.
Britmat e njerëzve që panë ngjarjen tragjike dhe më pas u përpoqën të ndihmonin në përpjekjet e shpëtimit të pasagjerëve ishin shurdhuese.
4 njësi zjarrfikëse dhe 10 zhytës morën pjesë në përpjekjet e kërkim-shpëtimit, me mbështetjen e ushtrisë, policisë, rojës bregdetare dhe autoriteteve lokale. Autoritetet kanë frikë se numri i pasagjerëve të vdekur mund të rritet. ©LAPSI.al
