Barry Keoghan ka folur hapur për urrejtjen dhe komentet negative që ka marrë në rrjetet sociale, teksa fama e tij në Hollywood është rritur.
Aktori i filmit Saltburn tregoi se kritikat ndaj pamjes së tij dhe sulmet online kanë ndikuar drejtpërdrejt në jetën personale dhe mirëqenien e tij mendore.
“Ka shumë urrejtje online. Ka shumë abuzime për mënyrën si dukem… më ka bërë të tërhiqem dhe të mbyllem në vetvete,” u shpreh ai gjatë një interviste, duke shtuar se situata “po bëhet problem”.
Aktori zbuloi se në vitin 2024 vendosi të mbyllë llogarinë e tij në Instagram për t’u distancuar nga negativiteti, megjithëse pranoi se herë pas here ende kontrollon reagimet për paraqitjet e tij publike.
Ai theksoi se kjo situatë e ka bërë të shmangë daljet dhe eventet: “Nuk shkoj më në shumë vende për shkak të këtyre gjërave.”
Barry Keoghan u shpreh i shqetësuar se kjo gjendje mund të ndikojë edhe në aktrimin e tij:
“Kur kjo fillon të ndikojë në artin tënd, atëherë bëhet problem.”
Ai gjithashtu shprehu shqetësim për djalin e tij, Brando, duke theksuar se komentet negative mund ta prekin në të ardhmen.
Pavarësisht sfidave, aktori vazhdon të jetë pjesë e projekteve të rëndësishme. Ai pritet të shfaqet në filmin Peaky Blinders: The Immortal Man, bazuar në serialin e famshëm Peaky Blinders, me protagonist Cillian Murphy.
Gjithashtu, ai është pjesë e një projekti ambicioz për filma biografikë mbi The Beatles, nën regjinë e Sam Mendes, ku do të interpretojë rolin e Ringo Starr.
