Në vitin 2025 rastet e zjarreve kanë shënuar një tjetër rritje duke e bërë gjithmonë e më sfiduese përballjen me to. Raporti i Drejtorisë së Mbrojtjes nga Zjarri dhe Shpërthimi për vitin e shkuar tregon se situate është bërë më e vështirë edhe në kushtet e ndryshimeve klimatike.
“Krahasuar me vitin 2024 ku ka pasur 10 226 raste zjarri, në vitin 2025 janë shënuar 306 raste zjarri më shumë. Në vitin 2024 ka pasur një numër total sipërfaqesh të djegura më shumë, por në vitin 2025 ka pasur një sezon zjarri intensiv dhe më të gjatë, me rritje të shpejtësisë së djegies dhe më shumë ndërhyrje zjarrfikëse, veçanërisht në muajt e verës, duke reflektuar kështu edhe ndikimin klimatik (valë të nxehtësisë dhe thatësira)” thuhet në raport.
Referuar kësaj panorama raporti nënvizon se ka nevojë për zgjerimin e kapaciteteve logjistike dhe njerëzore.
“Në vitin 2025 është evidentuar një rritje e ndjeshme e ndërhyrjeve, duke reflektuar një ngarkesë operative më të lartë për strukturat zjarrfikëse. Ky trend tregon zgjerim të rolit të shërbimit në menaxhimin e emergjencave dhe kërkon rishikim të kapaciteteve njerëzore dhe logjistike. Nga ana tjetër rritja e numrit të inspektimeve në vitin 2025 me 806 inspektime më shumë krahasuar me vitin 2024, përfaqëson një zhvillim pozitiv në aspektin e parandalimit” vlerëson raporti.
Megjithatë, dokumenti nënvizon se krahasimi me rritjen e zjarreve tregon se ndikimi parandalues i inspektimeve mbetet i kufizuar dhe kërkon riorientim drejt sektorëve me risk të lartë.
Ndërkohë gjatë vitit 2025 ka pasur një rritje të ndjeshme të ndërhyrjeve, duke reflektuar një ngarkesë operative më të lartë për strukturat e varësisë.
“Ky trend tregon zgjerimin e rolit të shërbimit dhe menaxhimit të emergjencave me qëllim përmirësimin e kapaciteteve logjistike dhe njerëzore. Gjatë vitit 2025 ka pasur 1871 raste ndërhyrje për shpëtim. Ndërhyrjet për shpëtim kanë shënuar nivelin më të lartë, në muajin dhjetor me 296 raste dhe numri më i ulët në muajin shkurt me 71 raste” thuhet në dokument. Monitor
