Departamenti Amerikan i Shtetit u ka kërkuar të gjitha përfaqësive diplomatike të SHBA-së në mbarë botën që të nisin “menjëherë” vlerësime emergjente të sigurisë.
Sipas një kabllogrami diplomatik të dërguar të martën dhe të siguruar nga Washington Post, ky urdhër vjen për shkak të “situatës në zhvillim në Lindjen e Mesme dhe rrezikut të pasojave të mundshme”.
Dokumenti thekson nevojën për rishikim të menjëhershëm të masave të sigurisë, në një moment kur tensionet në rajon mbeten të larta.
Megjithëse në javët e fundit udhëzime të ngjashme u janë dërguar ambasadave amerikane në Lindjen e Mesme, urdhri i së martës përbën herën e parë që një kërkesë e tillë shtrihet në të gjitha ambasadat e SHBA-së në botë.
Kabllogrami mban firmën e Sekretarit amerikan të Shtetit, Marco Rubio, dhe lidhet drejtpërdrejt me shqetësimet për sigurinë në kuadër të luftës me Iranin.
