Kancelari gjerman, Friedrich Merz, deklaroi se lufta në Iran nuk sjell përfitime për askënd dhe se pasojat e saj janë në dëm të të gjithëve.
Në një deklaratë të bërë këtë të mërkurë, Merz bëri të ditur se është në komunikim të përditshëm me liderë ndërkombëtarë lidhur me situatën në Iran, përfshirë kryeministrin britanik Keir Starmer, presidentin francez Emmanuel Macron dhe kryeministren italiane Giorgia Meloni.
Ai shtoi se Gjermania nuk është thirrur për të dhënë mendimin e saj mbi konfliktin në Iran, ndërsa shprehu skepticizëm nëse ekziston një plan konkret për të arritur ndryshime demokratike në vend.
Lexo më tej: Ny Times: Netanjahu shpreson për kryengritje në Iran. A po sheh ëndrra me sy hapur?
Më tej, Merz theksoi se Shtetet e Bashkuara dhe Evropa duhet të rrisin së bashku presionin ndaj Rusisë për të arritur paqe në Ukrainë. Sipas tij, kur të vijë momenti i duhur, si Gjermania ashtu edhe Ukraina do të marrin pjesë në negociatat për garancitë e sigurisë pas luftës.
Duke folur së fundmi në Bundestag, kancelari gjerman nënvizoi gjithashtu rëndësinë e përfundimit sa më të shpejtë të marrëveshjes tregtare mes Bashkimit Evropian dhe Shteteve të Bashkuara.
