Kreu i Partisë Demokratike, Sali Berisha deklaroi se dorëheqja e kryeministrit Edi Rama përbën zgjidhjen e vetme për krizën politike dhe ekonomike që sipas tij po përjeton vendi. Duke folur për mediat pak para nisjes së Kuvendit, Lideri i opozitës e akuzoi Ramën për shkelje të ligjit dhe Kushtetutës, për pasuri të paligjshme dhe për përpjekje për të bllokuar integrimin e Shqipërisë në Bashkimin Europian.
Ndër të tjera, Kryedemokrati u shpreh se qytetarët kërkojnë largimin e Ramës si mënyrën e vetme për të rikthyer normalitetin dhe dinjitetin në skenën politike shqiptare. Gjithashtu Berisha u shpreh se opozita do të votojë në Kuvend për heqjen e imunitetit të Belinda Ballukut, por theksoi se masa të tilla nuk janë zgjidhje për krizën politike.
"Qytetarët kërkojnë dorëheqjen e Edi Ramës si zgjidhjen e vetme të kësaj gjendje dhe të kësaj situate dramatike që përjeton vendi. Në një kohë kur Edi Rama, njeriu më i poshtëruar në detyrë sot, në të gjithë hapësirën e Bashkimit Europian dhe më gjerë, nuk ka sot një kryemnistër të poshtëruar para botës dhe popullit të tij siç është Edi Rama. Është i poshtëruar sepse po shkelmon ligjet dhe Kushtetutën për të mbrojtur vjedhjet e tij. Është i poshtëruar sepse për interesa të hajdutërisë së tij, pasurive të tij të paligjshme, po mbyll dyert e BE për Shqipërinë.
Është i poshtëruar se aty ky miraton ligje në parlament për firmën e tij, firmën ia merr Pëllumbesha Spirogjoka.
Është i poshtëruar se aty ku bën ligje që Linda e tij të jetë First Lady e Shqipërisë, zonja Begaj ia menderos ligjin.
Pra, Edi Rama përjeton periudhën e poshtërimit më maksimal të një qeveritari, të një kryeministri. Ne sot jemi këtu për të shprehur mendimin e qytetarëve shqiptarëve.
Do të votojmë në unison për heqjen e mandatit dhe arrestimin e Lubi Ballukut, por këto nuk janë zgjidhja e krizës është largimi i njeriut më të poshtëruar sot në skenën politike evropiane dhe perëndimore që quhet Edi Rama. Ju duhet ta dini këtë, që ai është njeriu i poshtëruar për aktet që ka kryer. Por ai, për të shpëtuar lëkurën e tij, është i gatshëm të pranojë çdo lloj poshtërimi që i bëhet. Nuk mund ta imagjinoni ju se si në darkat e tij të neveritshme, që ua nxjerr ato që hanë miqve, shkon dhe u përkulet, u bie në gjunjë si legen, për t’u kërkuar që të ndryshojnë mendimin. Ta dinë shqiptarët se ky është sot Edi Rama," tha Berisha.
