Në një vizitë në Departamentin Amerikan të Shtetit, Agron Shehaj deklaroi se kërkoi nga SHBA që mbështetja që po i japin drejtësisë në Shqipëri të vazhdojë.
Kreu i Partisë Mundësia e njoftoi takimin në rrjete sociale duke zbuluar se është pritur nga Lyn Debevoise, zv.drejtori i DASH për Europën Perëndimore dhe Qëndrore.
Shehaj bën me dije se gjatë takimit e ka informuar zyrtarin e lartë amerikan për 100 mijë firmat e mbledhura nga Partia Mundësia në mbështetje të drejtësisë, si dëshmi e qartë e vullnetit të shqiptarëve për një Shqipëri perëndimore.
“Për dekada, ëndrra e çdo shqiptari të ndershëm ka qenë fundi i pandëshkueshmërisë. Sot kjo po bëhet realitet. Si kurrë më parë, elita politike dhe kokat e krimit në Shqipëri po përballen me drejtësinë dhe ky është një moment historik.
Gjatë takimit, kërkova që kjo mbështetje të vazhdojë, sepse prokurorët dhe gjyqtarët janë nën sulme të vazhdueshme nga krimi i organizuar, pushteti politik dhe një pjesë e mediave”, shkruan Shehaj.
Shqipëria mund të bëhet pjesë e Perëndimit “vetëm kur askush të mos jetë mbi ligjin”, shkruan kreu i Mundësia në rrjetet sociale.
