Ben Affleck ka shitur startup-in e tij teknologjik të fuqizuar nga inteligjenca artificiale, InterPositive, te Netflix. Blerja, sipas një njoftimi të publikuar nga platforma më 5 mars, tregon se kompania po “investon në inovacionin e udhëhequr nga krijuesit që i mban regjisorët dhe autorët në qendër të procesit”.
Fituesi i çmimit Academy Awards do të shërbejë si këshilltar i lartë. Sipas Variety, InterPositive përbëhet nga 16 inxhinierë, studiues dhe krijues që do t’i bashkohen Netflix-it, duke përdorur teknologjinë e zhvilluar prej tyre për të ndihmuar në procesin e post-produksionit të projekteve të platformës.
“Në vitin 2022 kalova shumë kohë duke vëzhguar rritjen e hershme të inteligjencës artificiale në prodhim,” tha Affleck në një deklaratë. “Që artistët t’i përdorin këto mjete për të treguar historitë të cilave u kushtojmë jetën, ato duhet të ndërtohen posaçërisht për të përfaqësuar dhe mbrojtur të gjitha cilësitë që e bëjnë një histori të madhe.”
Affleck shpjegoi se InterPositive u themelua sepse ai “ndjente përgjegjësi ndaj kolegëve dhe industrisë për të mbrojtur fuqinë e krijimtarisë njerëzore dhe njerëzit që qëndrojnë pas saj”. Kompania trajnoi modele të inteligjencës artificiale të fokusuara te teknikat e realizimit të filmave — jo te performancat e aktorëve — duke krijuar mjete që artistët mund t’i përdorin, kontrollojnë dhe përfitojnë prej tyre.
Në një video të publikuar nga Netflix, Affleck bisedon me drejtoreshën e përmbajtjes Bela Bajaria dhe drejtoreshën e teknologjisë Elizabeth Stone. Ai tregoi se versionet e para të videove të krijuara me inteligjencë artificiale e kishin frikësuar, por më vonë kuptoi se shumë prej tyre “shpesh nuk funksiononin siç duhet”.
Sipas Affleck, me teknologjinë e InterPositive, filmi duhet të krijohet fillimisht në mënyrë tradicionale dhe më pas ndërtohet modeli i inteligjencës artificiale mbi të. “Pasi ta bëni këtë, modeli është i juaji dhe ju e kontrolloni atë,” shpjegoi ai.
Lajmi vjen pasi Affleck dhe bashkëpunëtori i tij i hershëm Matt Damon nënshkruan një marrëveshje të veçantë me Netflix për filmin aksion The Rip, i cili u publikua në platformë në janar. Sipas The New York Times, rreth 1,200 persona që punuan në prodhimin e filmit do të marrin një bonus nëse projekti rezulton i suksesshëm në platformë — një praktikë e rrallë për Netflix, që zakonisht paguan vetëm një tarifë paraprake për kastin dhe stafin.
