Janë mbushur 28 vjet nga rënia heroike e familjes Jashari, një nga ngjarjet më të lavdishme të historisë së re të Kosovës.
5 marsi tashmë shënon edhe nisjen e Epopesë së Ushtrisë Çlirimtare të Kosovës, ku aktivitetet do të zgjasin për tri ditë radhazi.
Në kazermën “Adem Jashari” është bërë rreshtimi i kuadrateve të FSK-së, ku presidentja Vjosa Osmani, teksa nderoi dhe çmoi kontributin e UÇK-së, deklaroi se FSK-ja është trashëgimtarja e denjë e saj.
Osmani theksoi se komandanti legjendar Adem Jashari dhe familja e tij e shndërruan gjakun e tyre në vulën e lirisë.
Ndërsa paradite është mbajtur edhe seancë solemne në Kuvendin e Kosovës.
Organizata e Veteranëve të Luftës së UÇK-së ka reaguar, pasi thonë se nuk u ftuan në seancën solemne të Kuvendit, duke thënë se është paradoksale të flitet për lavdinë e Ushtrisë Çlirimtare të Kosovës brenda sallës së Kuvendit, por të mos ftohen ata që luftuan.
