Këshilli i Sigurimit i OKB-së do të zhvillojë të shtunën një seancë urgjente, pas sulmeve ajrore të ndërmarra nga SHBA-ja dhe Izraeli ndaj Iranit. Mbledhja u kërkua nga misionet e përhershme të Francës, Bahreinit, Kinës, Rusisë dhe Kolumbisë, sipas përfaqësisë ruse në OKB. Izraeli dhe SHBA-ja e cilësuan operacionin si “sulm parandalues”. Ministri izraelit i Mbrojtjes, Israel Katz, shpalli gjendjen e jashtëzakonshme në vend.
Mediat izraelite raportuan se lideri suprem iranian, Ajatollah Ali Khamenei, mund të jetë vrarë, por kjo nuk është konfirmuar zyrtarisht. Sipas raportimeve, objektivat e goditura përfshinin institucione kyçe në Teheran, si parlamentin, presidencën, Këshillin Suprem të Sigurisë Kombëtare, Ministrinë e Inteligjencës dhe Organizatën e Energjisë Atomike, si edhe kompleksin e Udhëheqësit Suprem.
