Ish-vila e Enver Hoxhës u përfshi nga flakët mbrëmjen e sotme. protestues të Partisë Demokratike hodhën molotovë dhe fishekzjarrë në drejtim të godinës. forcat e rendit ndërhynë me ujë dhe spërkatës me piper për të shpërndarë turmën.
Ngjarja ndodhi pasi protesta kishte kaluar disa pika në kryeqytet. Pjesëmarrësit u mblodhën fillimisht para selisë së PD-së. Së bashku me kryedemokratin Sali Berishën dhe deputetë të opozitës, marshuan drejt kryeministrisë. Më pas, protesta u zhvendos drejt Drejtorisë së Përgjithshme të Policisë së Shtetit, ku efektivët krijuan një kordon për të ndaluar tubuesit. Gjatë përplasjeve pati tentativa për të çarë rrethimin, ndërsa policia reagoi me ujë dhe gaz lotsjellës.
Pas marshimit në disa zona të Tiranës dhe bllokimit të rrugëve, protesta u drejtua drejt zonës së ish-Bllokut. Aty, vila e ish-diktatorit u kthye në simbolikën e radhës të përplasjes politike, në një kohë kur Berisha e ka krahasuar shpesh kryeministrin Edi Rama me një diktator dhe mazhorancën me një regjim. Situata mbeti e tensionuar për disa minuta, deri në ndërhyrjen e plotë të forcave të rendit.
