Juventus ka nevojë për përgjigje pozitive kundër Galatasaray në ndeshjen e kthimit të playoff-it të Champions League. Skuadra e teknikut Luciano Spalletti, që po kalon një moment krize, ëndërron një natë lavdie në Europë për të përmbysur humbjen 5-2 të ndeshjes së parë dhe për të ndërprerë serinë negative që kulmoi me disfatën në shtëpi kundër Como-s. Juventus ka nevojë për një fitore me 4 gola diferencë, ndërkohë që nuk fiton që nga 1 shkurti mes kampionatit dhe Kupës.
Një ndeshje që vjen në një moment të vështirë edhe në aspektin psikologjik, sepse bardhezinjtë duket se kanë humbur atë besim dhe identitet që dukej se kishin fituar me “kurën Spalletti”. Janë shumë golat e pësuar, dhe në mënyrë të lehtë, për një skuadër që kundër turqve duhet të jetë e përkryer. Një përmbysje do t’i kthente besimin Juventus, që vetëm pak ditë më pas do të përballet me Romën në atë që mund të jetë një ndeshje vendimtare për kualifikimin në Champions. Ka shumë kureshtje për zgjedhjet e teknikut Spalletti, mes një Yildiz të dëmtuar lehtë dhe një sulmi ku pritet rikthimi i David.
Formacionet e mundshme
Luciano Spalletti duhet të përballet me disa dyshime formacioni për sfidën e Champions kundër Galatasaray. Në sulm vëmendja është te gjendja e Yildiz, që rrezikon të mungojë për shkak të një problemi në pulpë. Në vend të tij mund të luajë Boga, me McKennie dhe Conceiçao.
Këta tre mund të mbështesin Davidin, që rikthehet titullar. Në krah Cabal është i pezulluar dhe do të zëvendësohet nga Kostic. Di Gregorio konfirmohet në portë, pavarësisht pasigurive të fundit. Te Galatasaray është rikuperuar Osimhen, pas një shqetësimi në gju, me Yilmaz, Akgun dhe Lang në mbështetje.
JUVENTUS (4-2-3-1): Di Gregorio; Kalulu, Gatti, Kelly, Kostic; Locatelli, Thuram; Conceiçao, McKennie, Boga; David. Trajner: Spalletti
GALATASARAY (4-2-3-1): Cakir; Sallai, Sanchez, Bardakci, Jakobs; Sara, Torreira; Yilmaz, Akgun, Lang; Osimhen. Trajner: Okan Buruk
ATALANTA–BORUSSIA DORTMUND
Atalanta–Borussia Dortmund është ndeshja e kthimit e playoff-it të Champions që luhet sot në orën 18:45 dhe vlen kualifikimin në të tetat e finales. Rezultati i ndeshjes së parë (2-0) në favor të gjermanëve nuk lejon llogari: nëse “dea” dëshiron të kalojë, duhet të fitojë me 3 gola diferencë ose, në rast barazie në totalin e golave, të shpresojë te koha shtesë dhe penalltitë. Nëse skuadra e Palladinos kalon turin, mund të përballet me Arsenal ose Bayern Munich në short.
Atalanta vjen në këtë ndeshje pas fitores 2-1 në kampionat kundër Napolit, që i hapi një mundësi në luftën për vendin e katërt. Palladino nuk do të ketë në dispozicion Raspadorin dhe De Ketelaere, por rikthen nga minuta e parë Scamaccan dhe Edersonin. Në Bundesliga, skuadra e Kovacit është e dyta pas Bayern Munich (që tashmë ka siguruar titullin) dhe në javën e fundit barazoi 2-2 në fushën e Leipzigut.
Formacionet e mundshme
Palladino aktivizon Scalvinin në mbrojtje. De Roon dhe Ederson janë shtyllat e mesfushës. Samardzic preferohet ndaj Pasalic. Në sulm Scamacca titullar, ndryshe nga zgjedhja me Krstovic kundër Napolit. Te gjermanët, pa probleme formacioni: Guirassy në majë të sulmit, i mbështetur nga Brandt dhe Beier. Adeyemi e nis nga stoli.
ATALANTA (3-4-2-1): Carnesecchi; Scalvini, Djimsiti, Kolasinac; Zappacosta, De Roon, Ederson, Bernasconi; Samardzic, Zalewski; Scamacca. Trajner: Palladino
BORUSSIA DORTMUND (3-4-2-1): Kobel; Reggiani, Anton, Bensebaini; Ryerson, Bellingham, Nmecha, Svensson; Brandt, Beier; Guirassy. Trajner: Kovac
PARIS SAINT-GERMAIN – MONACO (21:00)
PSG hyn në ndeshjen e kthimit me avantazhin e krijuar në takimin e parë dhe synon ta menaxhojë atë në “Parc des Princes”. Monaco duhet të rrezikojë më shumë dhe të kërkojë një përmbysje, duke lënë hapësira në prapavijë. Përmbysja 3-2 në Principatë i ka dhënë siguri skuadrës së Luis Enrique.
REAL MADRID – BENFICA (21:00)
Real Madrid kërkon të konfirmojë epërsinë e ndeshjes së parë dhe të administrojë rezultatin në “Santiago Bernabéu”. Benfica, e detyruar të sulmojë, do të provojë të shfrytëzojë çdo episod për të mbajtur gjallë shpresat e kualifikimit. Për Mourinho një kthim i vështirë në stadiumin ku dikur ishte idhull.
