Një person i armatosur me një pushkë dhe një bidon me benzinë hyri ilegalisht në perimetrin e sigurisë së rezidencës Mar-a-Lago të Donald Trump në Florida të dielën. Ai u qëllua për vdekje nga agjentë të Shërbimit Sekret të SHBA-së. Në ato momente Trump ndodhej në Uashington.
"Një person i armatosur u qëllua dhe u vra (...) pasi hyri ilegalisht në perimetrin e sigurisë së Mar-a-Lago herët këtë mëngjes," - njoftoi nëpërmjet X, Anthony Guillermini, një zëdhënës i Shërbimit Sekret, i cili është përgjegjës për mbrojtjen e politikanëve të lartë amerikanë.
"Rreth orës 1:30 të mëngjesit, një burrë në të 20-at u pa pranë hyrjes veriore të pronës Mar-a-Lago i armatosur me atë që dukej të ishte një pushkë dhe një bombël gazi" - shpjegoi ai.
Pasi u përballën me personin, oficerët qëlluan disa herë, tha ai. Gjatë një konference të shkurtër për shtyp më vonë, zyrtarët e zbatimit të ligjit dhanë hollësi mbi ngjarjen.
"Fjalët e vetme që i thamë ishin “hidh atë që mban në dorë”, që ishin bidoni i benzinës dhe pushka", - tha Sherifi i Qarkut Palm Beach, Rick Branch.
“Në atë moment ai e hodhi kanaçen dhe e ngriti armën në pozicion qitjeje” dhe “në atë kohë” një oficer i Zyrës së Sherifit të Qarkut Palm Beach dhe agjentë të Shërbimit Sekret “hapën zjarr dhe neutralizuan kërcënimin”.
I dyshuari “vdiq në vendngjarje”. Asnjë oficer nuk u lëndua.
Zbatuesit e ligjit nuk dhanë asnjë informacion të mëtejshëm në lidhje me identitetin e të dyshuarit, por treguan një foto të pushkës gjatë një konference për shtyp.
FBI-ja u kërkoi banorëve në zonë të kontrollonin kamerat e tyre të mbikëqyrjes. ©LAPSI.al
