Protesta e së premtes ishte e pazakontë për shkak të sasisë së madhe të gazit lotsjellës që është hedhur nga policia e Tiranës. Për shkak të gazit janë prekur protestues, qytetarë të shumtë, por edhe gazetarë që po raportojnë.
Një nga protestuesit është lënduar. Ai është shtrirë në tokë, ndërsa qytetarë dhe deputetë të PD-së kanë tentuar t'i ofrojnë ndihmën e parë.
Incidenti ka ndodhur në hyrje të Kalasë së Tiranës, ku i riu është gjendur në gjendje të rëndë, pas sulmit me gaz lotsjellës, duke pritur ndihmën e ambulancës.
Sipas raportimeve, në shesh nuk ka ambulancë të pranishme, por vetëm autobotë të shumtë dhe një numër i madh policësh të cilët sulmojnë qytetarët, duke bërë që qytetari të transportohej me një mjet privat në spital.
Situata vijon të jetë e tensionuar edhe në zonën e Rrugës së Elbasanit ku vijojnë të hidhen molotovë e gaz lotsjellës. Mësohet se policia ka nisur shoqërimet. 2 persona janë ndaluar sepse sipas policisë kishin molotovë me vete. Më herët janë shoqëruar edhe 2 persona të mitur. /LAPSI.al
