Zyrtarët amerikanë janë shprehur pozitivë pas bisedimeve me iranianët të zhvilluara këtë të martë në Gjenevë.
Sipas tyre, SHBA-të do të jenë në pritje që të marrin propozime të hollësishme nga qeveria iraniane për të adresuar boshllëqet në qëndrimet e të dy vendeve, në një afat kohor prej dyjavësh të kërkuar nga Teherani.
“U bë përparim, por ka ende shumë detaje për t’u diskutuar. Iranianët thanë se do të ktheheshin në dy javët e ardhshme me propozime të detajuara për të adresuar disa nga boshllëqet e hapura në qëndrimet tona”, tha një zyrtar amerikan.
Rezultati dukej pozitiv, por vjen ndërsa ushtria amerikane vazhdon të ndërtojë pozicionin e saj në Lindjen e Mesme. Presidenti Donald Trump e ka paralajmëruar Iranin për një rezultat "shumë traumatik" nëse nuk bien dakord për një marrëveshje në javët e ardhshme.
Iranianët kanë lënë të kuptohet nëpërmjet ndërmjetësve përpara bisedimeve se mund të transferojnë disa nga rezervat e tyre të uraniumit në Rusi dhe se do të jenë të hapur për marrëveshje ekonomike me SHBA-në si pjesë e një marrëveshjeje të re bërthamore, por nuk është e qartë nëse këto çështje specifike u ngritën në bisedimet e së martës, thanë burimet.
Iranianët kanë sinjalizuar gjithashtu se do të jenë të hapur për të ndaluar pasurimin për një periudhë kohore, por kanë thënë se një ndalim i përhershëm i pasurimit është i papranueshëm, thanë burimet.
