Shefi i njohur i kuzhinës, Gordon Ramsay, ka komentuar për herë të parë publikisht përplasjen mes Brooklyn Beckham dhe prindërve të tij, David Beckham dhe Victoria Beckham, duke sugjeruar se i riu mund të jetë “i verbuar nga dashuria”.
Në një intervistë për The Sun, teksa promovonte serialin e tij të ri në Netflix, “Being Gordon Ramsay”, kuzhinieri 59-vjeçar u shpreh se situata është e ndërlikuar.
“Është e vështirë, apo jo, kur je i dashuruar? Dashuria është e verbër. E thonë për një arsye,” deklaroi Ramsay.
Ai theksoi se Brooklyn është “i dëshpëruar të qëndrojë në këmbët e veta” dhe të krijojë rrugën e tij, por shtoi se nuk duhet të harrojë prej nga vjen.
“E respektoj për këtë. Është diçka shumë e mirë. Por duhet të kujtojë prej nga ka ardhur. Një ditë nuk do t’i ketë më mamin dhe babain, dhe duhet ta kuptojë këtë,” u shpreh ai.
Ramsay konfirmoi se Victoria Beckham është e lënduar nga përçarja familjare.
“Victoria është e mërzitur, dhe me të drejtë,” tha ai, duke shtuar se e njeh shumë mirë dashurinë që David Beckham ka për djalin e tij të madh. “E di 24/7 sa shumë e do David Brooklyn-in,” theksoi ai.
Marrëdhëniet mes Brooklyn, 26 vjeç, dhe familjes së tij u tensionuan publikisht në muajt e fundit, sidomos pas deklaratës së fortë që ai publikoi në janar, ku shprehej se nuk dëshironte pajtim me prindërit dhe i akuzonte ata për “kontroll të narrativës në media”.
Ai gjithashtu pretendoi se nëna e tij kishte shkatërruar vallëzimin e parë në dasmën e tij me Nicola Peltz në vitin 2022.
Megjithatë, Ramsay mbetet optimist se raporti mes babait dhe djalit do të rregullohet.
“Koha do të jetë shëruesi më i mirë, dhe David do ta rikthejë patjetër atë marrëdhënie në rrugën e duhur,” u shpreh ai.
