GJKKO i ka komunikuar masën e arrestit me burg Sergej Hasanpapajt. Ai u ekstradua nga Belgjika ditën e djeshme, ndërsa akuzohet si i përfshirë në vrasjen e Bledar Muçës, ngjarje e ndodhur më 22 janar 2022 në Aartselaar.
Po ashtu, Muça rezulton i përfshirë në sagën e krimeve në Elbasan, si mik i familjes Çapja.
Sergej Hasanpapaj është ekstraduar nga Belgjika drejt Shqipërisë pas urdhërarrestit të lëshuar nga SPAK, nën akuzën për përfshirje në vrasjen e Bledar Muçës, ngjarje e ndodhur më 22 janar 2022 në Aartselaar të Belgjikës. Për të njëjtën çështje, autoritetet kanë arrestuar edhe një 43-vjeçar në aeroportin e Valencias në Spanjë, i dyshuar si bashkëpunëtor në krim për dhënie informacioni. Sipas mediave spanjolle, ai është dënuar me burgim të përjetshëm.
Vrasja e Bledar Muçës, i njohur si mik i afërt dhe bashkëpunëtor i familjes Çapja në Elbasan, tronditi opinionin publik për shkak të profilit të tij në botën e krimit. Hetimet e përbashkëta mes autoriteteve shqiptare dhe atyre evropiane bënë të mundur identifikimin e autorëve të dyshuar, duke hedhur dritë mbi ekzekutimin e një prej figurave të njohura të krimit shqiptar që vepronte edhe jashtë vendit.
39-vjeçari me origjinë nga Peshkopia dhe i rritur në Elbasan kishte një të kaluar të ngarkuar kriminale, me disa atentate të mbijetuara dhe akuza për përfshirje në disa vrasje, të cilat nuk u provuan asnjëherë nga drejtësia. Emri i tij ishte përmendur në disa ngjarje të rënda kriminale ndër vite, ndërsa më herët ishte shpallur edhe në kërkim ndërkombëtar, përpara se çështjet ndaj tij të pushoheshin.
