Mesazhet që nxisin luftën ndaj krimit dhe trafikut të drogës janë shndërruar tashmë në refren të zyrtarëve të DASH që vijnë në Shqipëri. I tillë ishte edhe ai që erdhi nga Drejtori i Zyrës për Europën dhe Azinë i Byrosë së Çështjeve Ndërkombëtare të Narkotikëve dhe Zbatimit të Ligjit të Departamentit të Shtetit, Mark Tervakoski.
Ai ka takuar presidentin Begaj, prokurorë të SPAK dhe zyrtarë të policisë. Por ajo që bie në sy është se në radhën e zyrtarëve të lartë që mungojnë në takimet e Tervakoskit janë kryeministri Edi Rama dhe Drejtori i Përgjithshëm i policisë, Ilir Proda.
"Duke shfaqur forcën e partneritetit në fushën e zbatimit të ligjit mes Shteteve të Bashkuara dhe Shqipërisë dhe luftën e palodhur të Administratës Trump kundër krimit të organizuar ndërkombëtar dhe trafikimit të narkotikëve, Drejtori i Zyrës për Europën dhe Azinë i Byrosë së Çështjeve Ndërkombëtare të Narkotikëve dhe Zbatimit të Ligjit të Departamentit të Shtetit, Mark Tervakoski, u takua me përfaqësues të zbatimit të ligjit, drejtësisë, shoqërisë civile dhe misioneve ndërkombëtare në Shqipëri. Shtetet e Bashkuara janë të përqendruara në ofrimin e aftësive, mjeteve dhe bashkëpunimit në Shqipëri dhe në rang global për partnerët që ndajnë angazhimin tonë për të luftuar kriminelët që dëmtojnë qytetarët e vendeve tona, kërcënojnë kufijtë tanë dhe cenojnë sigurinë tonë kombëtare" thuhet në njoftimin e ambasadës amerikane.
