Një përleshje shpërtheu në parlamentin e Turqisë këtë të mërkurë, pasi ligjvënësit e partisë AK në pushtet u përplasën me ata të opozitës për shkak të emërimit të një figure kontroverse në Ministrinë e Drejtësisë në një riorganizim të kabinetit.
Ligjvënësit e opozitës u përpoqën ta bllokonin Akın Gürlek, të cilin Presidenti Rexhep Tajip Erdogan e emëroi në portofolin më të lartë gjyqësor, nga bërja e betimit në parlament. Tensionet u ndezën dhe ligjvënësit shtynë njëri-tjetrin ku nuk munguan edhe goditjet me grushte.
Si kryeprokuror i Stambollit, Gürlek kishte kryesuar gjyqe të profilit të lartë kundër disa anëtarëve të partisë kryesore të opozitës, Partisë Republikane Popullore (CHP), procedura që opozita i ka denoncuar prej kohësh si të motivuara politikisht.
Përleshja e detyroi kryetarin e parlamentit të ndërpresë seancën për 15 minuta derisa të rivendosej rendi.
Ish-prokurori u pa më vonë duke bërë betimin i rrethuar nga ligjvënës të partisë në pushtet.
Qindra zyrtarë nga bashkitë e drejtuara nga CHP janë arrestuar në hetime për korrupsion. Midis tyre ishte kryebashkiaku i Stambollit, Ekrem İmamoğlu, i parë gjerësisht si rivali kryesor i Erdoganit, i cili u arrestua vitin e kaluar. ©LAPSI.al
