Dinamo fiton bindshëm ndaj Tiranës dhe afrohet me gjysmëfinalet e Kupës

Dinamo ka marrë një fitore 2-0 ndaj Tiranës në ndeshjen e parë të çerekfinales së Kupës së Shqipërisë, duke bërë një hap të rëndësishëm drejt gjysmëfinaleve.

Blutë kontrolluan lojën që nga minuta e parë, duke kërkuar vazhdimisht golin. Tirana mbeti kryesisht në pritje të një kundërsulmi që nuk u konkretizua gjatë gjithë sfidës. Gol i avantazhit erdhi falë Vilës, ndërsa Bregu vulosi rezultatin në shtesë. Ky rezultat i jep Dinamos një avantazh të rëndësishëm para ndeshjes së kthimit.

Ilir Daja: Kënaqësi për fitoren dhe kontrollin e lojës

Pas ndeshjes, trajneri i Dinamos, Ilir Daja, shprehu kënaqësinë e tij për fitoren dhe performancën e ekipit:
“Të fitosh në derbi me Tiranën është gjithmonë kënaqësi. Kupa ka 180 minuta dhe kjo ishte vetëm ndeshja e parë, por kemi bërë një hap të mirë. Ekipi ka luajtur sipas asaj që kërkon Kupa, duke qenë i ekuilibruar dhe duke krijuar rrezik në zonat vendimtare. Është e rëndësishme të vazhdojmë të bëjmë mirë edhe në ndeshjen e kthimit,” tha Daja, duke përmendur edhe golin e anuluar të Vilës: “Për çfarë duhej ta prekte atë topin? Do ta shohim e diskutojmë…”

Ardijan Nuhiju: Mungesat dhe përqendrimi te kampionati

Nga ana tjetër, trajneri i Tiranës, Ardijan Nuhiju, theksoi se mungesat dhe forma jo optimale e disa lojtarëve ndikuan te paraqitja e ekipit:
“Mungesat ndikojnë padiskutim, janë futbollistë shumë të rëndësishëm për ne. Kjo ishte maksimumi i skuadrës sot, dhe u munduam të shfrytëzojmë forcat që kishim. Nëse do kishim të gjithë lojtarët në formë, do të flisnim ndryshe. Nuk është dorëzim, por përqendrimi ynë kryesor mbetet te kampionati dhe ndeshja e radhës,” tha Nuhiju për RTSH.

Me këtë fitore, Dinamo ka ngritur në maksimum mundësinë për të siguruar një vend në gjysmëfinale, ndërsa Tirana do të përpiqet të rikuperojë forcat dhe lojtarët e munguar për ndeshjen e kthimit.