Seth Rogen i bëri një homazh prekës aktores legjendare Catherine O’Hara gjatë ceremonisë së Directors Guild of America Awards 2026.
Aktori dhe regjisori 43-vjeçar doli në skenë së bashku me bashkëpunëtorin e tij të hershëm, Evan Goldberg, për të pranuar çmimin Arritja më e Mirë Regjisoriale në Serial Komedi për serialin e Apple TV+ “The Studio”.
Catherine O’Hara, e cila ndërroi jetë më 30 janar në moshën 71-vjeçare, kishte luajtur përkrah tyre në serial dhe ishte një nga figurat më të dashura të kastit.
“Sinqerisht, nuk ka askënd që do të donim ta falënderonim personalisht më shumë se Catherine O’Hara në këtë moment,” tha Rogen, sipas Deadline. Ndërsa Goldberg shtoi: “Jemi rritur në Kanada dhe ajo ka qenë, fjalë për fjalë, idhulli ynë që kur ishim fëmijë.”
Rogen ndau edhe një kujtim nga xhirimet, duke përmendur filmin “Home Alone”, që sipas tij e frymëzoi të merrej me kinematografi: “Në atë film ajo bërtet vazhdimisht ‘Kevin! Kevin!’. Në xhirime ne bënim shaka duke bërtitur ‘Evan! Evan!’ – ishte si të ishim sërish në Home Alone.”
Në fjalimin e tij, Rogen theksoi gjithashtu anën njerëzore të aktores: “Ajo tregoi se mund të jesh një gjeni absolut dhe njëkohësisht njeriu më i sjellshëm në botë. Ishte një nder ta drejtonim çdo ditë dhe u përpoqëm shumë që seriali të ishte i denjë për praninë e saj.”
Rogen dhe Goldberg fituan çmimin për episodin “The Magic Hour”, ndërsa O’Hara ishte nderuar edhe më herët nga Rogen përmes një postimi emocional në Instagram pas ndarjes së saj nga jeta.
