Analisti Fatos Lubonja i ftuar në emisionin “Interview” nga Mirela Milori në Euronews Albania ka zbuluar detaje nga jeta e tij ndërsa foli edhe lidhur me marrëdhënien e tij me kryeministrin Edi Rama. Lubonja theksoi se Rama pas futjes në politikë filloi të kërkojë votën dhe jo të vërtetën.
“Ajo që ndodhi pas "97-s është ajo rëndom ka ndodhur, që pushteti të të tjetërsojë. E kanë pyetur Pietro Nenni-n për faktin që ka qenë shumë mik me Musolinin përpara se Musolini ishte socialist, pastaj u bë fashist dhe ndërtoi lëvizjen e tij. Dhe i thanë: “Çfarë ore, si ishte puna?”, sepse kishin qenë bashkë si Pietro Neni, senator italian, për ata që s’e njohin, një figurë e njohur politike në Italinë e pas luftës.
Si ishte puna e Mussolinit që u kthye? Hë? Ai tha, ka një shprehje në italisht: "Aveva una grande volja di comandare", domethënë kishte një dëshirë të madhe për të komanduar. Më konkretisht, pra, të gjitha ato vlera ideale apo vizione që kishim… për një tjetër gjë, dolën tjetër.
Për mua, të gjitha këto i tradhtoi si intelektual. Për ta thënë me dy fjalë, në atë kohë unë kam shkruar, kur u rrah Rama, një shkrim të gjatë te "Koha Jonë" të nesërmen. Midis tjerash kam cituar një intervistë që Rama do botonte dhe që s’botoi dot, ku midis tjerash thoshte: “Intelektuali kërkon të vërtetën, ndërsa politikani kërkon votën.” Kjo e dallon.
E tani, kur u bë politikan, ky filloi të kërkojë votën dhe jo të vërtetën. Dhe të kërkosh votën do të thotë shumëçka, e kuptojnë njerëzit”, - tha ai. /Euronews Albania
