Kolegji i Posaçëm të Apelimit, KPA vendosi të hënën më 26 janar prishjen e vendimit të Komisionit për shkarkimin e prokurorit të Vlorës, Xhemal Saliaj dhe e riktheu në detyrë këtë subjekti rivlerësimi. Vendimi u mor me shumicë votash nga trupi gjykues i Kolegjit të Posaçëm të Apelimit, i kryesuar nga Ina Rama, me relator Sokol Çomon dhe anëtare Mimoza Tasi, Natasha Mulaj e Rezarta Schuetz, pas shqyrtimit në dhomë këshillimi të ankimit të Saliajt ndaj vendimarrjes së Komisionit. Vendimi i KPA për konfirmimin e këtij magjistrati është përfundimtar dhe ka efekt të menjëhershëm.
Prokurori i Vlorës, Xhemal Saliaj u shkarkua nga detyra prej Komisionit të Pavarur të Kualifikimit me shumicë votash më 7 tetor 2024, pasi u konkludua se nuk arriti nivel të besueshëm në vlerësimin e pasurisë dhe se në vlerësimin tërësor kishte cënuar besimin e publikut te drejtësia. Kjo vendimmarrje u rrëzua të hënën si e padrejtë nga Kolegji.
Xhemal Saliaj e filloi karrierën në sistemin e drejtësisë në vitin 2003 si prokuror në Prokurorinë e Beratit, ku ka ushtruar dhe funksionin e drejtuesit. Prej vitit 2013, Saliaj e ushtron funksionin në Prokurorinë e Vlorës.
