Julio Iglesias u akuzua javën e kaluar për sulm ndaj dy ish-punonjëseve, ngjarje që sipas padisë dyshohet se kanë ndodhur në vitin 2021. Akuzat kanë vënë në qendër të vëmendjes jo vetëm këngëtarin spanjoll, por edhe rrethin e tij më të afërt familjar, përfshirë djalin e tij, Enrique Iglesias, i cili po përballet me presion të madh mediatik.
Organizata Women’s Link Worldwide depozitoi kallëzimin në Prokurorinë e Gjykatës Kombëtare më 5 janar. Pas disa ditësh heshtjeje, Julio Iglesias reagoi publikisht duke mohuar kategorikisht akuzat. Në deklaratën e tij, ai thekson se nuk ka “detyruar, abuzuar apo ka treguar mungesë respekti ndaj asnjë gruaje”, duke i cilësuar pretendimet si “absolutisht të pavërteta”.
Pas publikimit të deklaratës në profilin e tij zyrtar në Instagram, reagimet nga familjarët nuk vonuan. Bashkëshortja e tij, Miranda Rijnsburger, shprehu mbështetje të hapur me komentin e shkurtër, por domethënës: “Gjithmonë në krahun tënd.”
Megjithatë, qëndrimet brenda familjes Iglesias kanë qenë të ndryshme. Enrique Iglesias ka zgjedhur të mos bëjë asnjë deklaratë publike lidhur me akuzat ndaj të atit. Aktiviteti i tij në rrjetet sociale është interpretuar nga shumëkush si një përpjekje për të mbajtur distancë. Pas disa ditësh heshtjeje, ai publikoi një video të re në Instagram, pa asnjë referencë ndaj situatës.
