Mali do fitonte Kupën e Afrikës me magji: arrestohet shtrigani, mori 30 mijë euro

Një i ashtuquajtur "marabù" është arrestuar në Mali pasi kishte arkëtuar rreth 30 mijë euro nga tifozë të bindur se fuqitë e tij mistike mund t’i garantonin fitoren e Kupës së Afrikës. Shtrigani, Karamogo Sinayoko, kishte siguruar mbështetësit se ishte “zgjedhur nga Zoti” për ta çuar përfaqësuesen e Malit drejt triumfit në turneun kontinental. Besueshmëria e tij ishte rritur pas suksesit në të tetat e finales kundër Tunizisë, ardhur në mënyrë të pabesueshme: Mali, i mbetur me dhjetë lojtarë për pjesën më të madhe të ndeshjes, kishte barazuar në minutat e fundit përpara se të fitonte me penallti. Një rezultat që shumë e kishin interpretuar si provë të efektivitetit të ritualeve të premtuara nga i ashtuquajturi “marabù”. Në valën e entuziazmit, Sinayoko kishte mbledhur shuma të tjera parash, duke u betuar mbi Kuran se do ta përsëriste “mrekullinë” edhe në çerekfinale. Por humbja 1-0 kundër Senegalit ndryshoi shpejt klimën. Në fund të ndeshjes, dhjetëra tifozë të zemëruar u mblodhën para banesës së tij në Bamako, duke hedhur gurë dhe duke dëmtuar ndërtesën.

🇲🇦CAN2025 Les Maliens 🇲🇱 ont remi la somme de 3 millions à Karamogo Sinayoko, un feticheur malien pour commencer les travaux mystiques afin que le Mali 🇲🇱 gagne ce soir son match face à la Tunisie 🇹🇳. Il faut rappeler que ce féticheur Malien, Karamogo Sinayoko est très… pic.twitter.com/QQ5FYgnakO

— Varan 🐊 2.0🇨🇮 (@LucaVaran) January 3, 2026

Arrestimi i mashtruesit

Ndërhyrja e policisë shmangu pasoja më të rënda dhe çoi në arrestimin e burrit, tani i akuzuar për mashtrim dhe nën hetim për sharlatanizëm. Sipas autoriteteve, rasti ndiqet edhe nga njësi të specializuara në krime informatike, duke qenë se mbledhja e parave kishte ndodhur pjesërisht përmes kanaleve dixhitale. Pas ndalimit, Sinayoko u përpoq të mbrohej duke thënë se nuk kishte mundur kurrë të kontrollonte rezultatin e ndeshjeve: ai deklaroi se kishte kryer “punën e tij shpirtërore”, por vendimi përfundimtar i takonte Zotit. Ngjarja rihap debatin mbi rolin e besimeve mistike në futbollin afrikan, një fenomen i rrënjosur dhe shpesh i diskutueshëm, që vazhdon të ndërthuret me pasionin popullor për futbollin.