Vit i Ri, fat i ri, ose të paktën kështu shpresojnë disa nga skuadrat e Abissnet Superiores që e kanë patur jetën të vështirë në vitin që lamë pas. E pas shijes në 1/8 e Kupës së Shqipërisë të shtunën, radhën e ka kampionati që luan javën e 19 të mërkurën e të enjten, me të gjitha skuadrat që ndezin motorët për gjysmën e mbetur të sezonit. Sfida që mund të ndryshojnë në fakt si kreun e klasifikimit, ashtu edhe të japin mesazhet që më së shumti i presin në Vlorë e Tiranë, spondin bardheblu të kryeqytetit.
Njerëzit e Nuhiut nuk është se treguan atë që pritej, me një kualifikim të vuajtur ndaj Skënderbeut, por me një Xhixha më shumë e një Ernest edhe me më shumë minuta, gjërat mund të duken ndryshe në një ndeshje vendimtare në Ballsh. 8 pikë janë që tani e nëse Tirana humbet, distanca me zonën e shpëtimit kthehet në abis.
Më pak dramatike, por aq fondamentale është situata e Flamurtarit, që 4 ditë pas humbjes në Elbasan Arena, viziton Elbasanin tani për kampionat për të mos humbur kontaktet edhe më shumë me Bylis e Vorën. Gvozdenovic kërkon fitoren e 4 sezonale me kuqezinjtë, me veshët nga Loro Borici, ku Vllaznia e rigjeneruar nga dy fitore radhazi mes kampionatit e Kupës, duhet të kthejë bindjen në Shkodër përballë Egnatias kryesuese. Nën pushtetin e merkatos, Tetova është në ankth të mësojë cilët lojtarë do të ketë e për sa kohë, por ai që rrezikon më shumë është Martini dhe, jo të humbasë lojtarë, por shumë më tepër.
Lexo më tej: Derbi i kryeqytetit në Kupën e Shqipërisë: shorti “dënon” Tiranën, buzëqesh Vllaznia
Teuta, pas provës bindëse në Kupë, pret një konfirmim ndaj Dinamos së fortë me Dobin që po sheh skuadrën të dobësohet në kohën kur pret përforcime. Dicka e ngjashme e përjetuar edhe nga Daja, që i ka dhënë lamtumirën Karambës, por që insiston ta mbajë veten te pretendentët kryesore, mundësisht duke parakaluar edhe Elbasanin, deri sa të shohë sulmuesin e shpresuar të mbërrijë në Arbanë. Partizani do të inaugurojë stadiumin e ri të Vorës, në tentativë të reduktimit të atij 5 pikëshi që e ndan nga zona e Final 4. Një stadium euforik për të mirëpritur lojtarët e Bellait për herë të parë, që kushedi, ndoshta i ka bërë pishman të kuqtë që nuk luajtën në fushë asnjëanëse dhe pranuan propozimin e vorakëve për të ndryshuar kalendarin në fazën e dytë.
SUPERIORE, JAVA 19
14 janar
Bylis – Tirana, ora 13:30
Vllaznia – Egnatia, ora 17:00
Elbasani – Flamurtari, ora 17:00
15 janar
Partizani – Vora, ora 13:30 (Stadiumi “KF Vora”)
Teuta – Dinamo, ora 17:00
