Cher thuhet se është në negociata me Netflix për një serial dokumentar me vlerë rreth 12.6 milionë paund, e cila do të ofrojë një zhytje të thellë në jetën e saj personale dhe profesionale.
Këngëtarja, e cila mbush 80 vjeç në maj, pritet të nënshkruajë një marrëveshje për një seri me shtatë episode. Sipas The Sun, dokumentari – me titull pune “Sharing Her Story” – mund të dalë në platformë deri në fund të vitit 2026, në të njëjtën periudhë me publikimin e pjesës së dytë të autobiografisë së saj, e planifikuar për në nëntor.
Burime pranë projektit thonë se marrëveshja është “pothuajse e mbyllur” dhe se seria do të trajtojë si momentet kulmore ashtu edhe vështirësitë e jetës së Cher, përfshirë marrëdhëniet personale, karrierën e gjatë në muzikë dhe film, si edhe sfidat familjare.
Në autobiografinë e saj, Cher ka folur hapur për martesën me Sonny Bono (1969–1975), duke përshkruar një marrëdhënie problematike dhe ndjenja të forta izolimi. Nga kjo martesë lindi djali i tyre, Chaz Bono. Më pas, Cher u martua me Gregg Allman, bashkëthemelues i The Allman Brothers Band, me të cilin pati djalin Elijah Blue.
Përveç dokumentarit, këngëtarja ka konfirmuar se një biografi filmike është në zhvillim e sipër në Universal Pictures. Po ashtu, ajo është rikthyer në studio për të punuar në atë që besohet të jetë albumi i saj i fundit, duke u shprehur se është shumë e entuziazmuar për këngët e reja.
Së fundmi, Cher ka tërhequr vëmendje edhe për jetën e saj personale, duke qenë në një lidhje me drejtuesin e muzikës Alexander “AE” Edwards, 40 vite më i ri se ajo. Në një intervistë për CBS Mornings, ajo u shpreh: “Ne qeshim gjatë gjithë kohës… i dua momentet me të,” duke shtuar se kritikat nuk e ndikojnë.
