Në prag të Kupës së Botës 2026, FIFA do të prezantojë një risi teknologjike që do të ndryshojë mënyrën e përdorimit të VAR-it: vendime të mbështetura nga avatarë AI ultra-realistë.
Ndryshe nga modelet e stilizuara të mëparshme, sistemi i ri do të krijojë një kopje dixhitale jashtëzakonisht besnike të çdo lojtari në fushë. Funksionimi bazohet në një rrjet kamerash me shpejtësi të lartë të instaluara në stadiume, të afta të rilevojnë deri në 29 pika të trupit të çdo futbollisti, duke regjistruar lëvizjet e tyre 50 herë në sekondë.
FIFA revolucionon futbollin me AI e modele 3D në Botërorin 2026
Inteligjenca artificiale do t’i përpunojë këto të dhëna për të krijuar një rindërtim tredimensional të saktë, që riprodhon me përpikëri qëndrimin, shpatullat, këmbët dhe pozicionin e trupit në çastin e saktë të pasimit. Kështu, arbitrat e VAR-it do të mund të përcaktojnë me më shumë saktësi nëse një pjesë e trupit e vlefshme për shënim ndodhet përtej vijës së pozicionit jashtë loje, duke eliminuar përfundimisht problemin e “vijave milimetrike” dhe imazheve të paqarta që kanë ndezur kaq shumë polemika.
Një nga objektivat kryesore të FIFA-s është edhe përmirësimi i kuptueshmërisë për publikun. Animacionet e mëparshme të offside-it gjysmë-automatik shpesh dukeshin të ftohta dhe artificiale; tani, në ekranet e stadiumeve dhe në transmetimet televizive do të shfaqen avatarë që i ngjajnë vërtet lojtarëve realë, si në pamje ashtu edhe në lëvizje.
Për më tepër, përpunimi ultra-i shpejtë i të dhënave do të lejojë që vendimi final të merret brenda pak sekondash, duke minimizuar ndërprerjet dhe duke e bërë VAR-in më të rrjedhshëm dhe më transparent.
